Tag Archives: Greg Bituin Jr

[Tula] Sa panahon ng mga robot -ni Greg Bituin Jr.

Sa panahon ng mga robot

sinanay sila upang maging mga ala-robot
sumunod lang sa chain-of-command at huwag sumagot
sinanay sa “yes sir”, tiger look na nakakatakot
sinanay raw nang sa laban ay di lalambot-lambot

kaya trato nila sa mga sibilyan ay plebo
na papaluin lang upang disiplinahin ito
hazing sa akademya’y dinala nila sa tao
babanatan agad ang pasaway o kalaboso

kaya sa kwarantina’y walang kara-karapatan
ang mamamayang tinatrato nang parang kalaban
nirerespeto lang nila’y naghahari-harian
tingin sa sarili’y mas mataas kaysa sibilyan

kasangkapan lang sila ng dalahirang rehimen
tanging kakampi niya’t sunud-sunurang alipin
kaya sa Terror Bill ay gigil isabatas na rin
na siyang magtatanggol sa pangulong utak-lumpen

ganyan ang utak ng mga robot na palamara
mabuti pang maalis ang lupit ng istruktura
at maitayo ang totoong depensa ng masa
mula sa mamamayang marunong makipagkapwa

karapatang pantao’y kanilang iginagalang
bawal sa kanila ang E.J.K. o pamamaslang
dinadaan sa wastong proseso ang bawat hakbang
sinanay silang magalang, di maging salanggapang

#JunkTerrorBillNow
#AyawNaminSaTerorismoNgEstado

– gregbituinjr.
06.13.2020

Submit your contribution online through HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc

[Tula] Sabi nila’y “Presente” ni Greg Bituin Jr.

“Presente”, ang sabi nilang may hawak na larawan
sa taunang Kalbaryo ng Kawalang Katarungan
patunay na ang mahal nila’y di nalilimutan
na winala noon, di na makita ang katawan

sila’y iwinala gayong pinaglaban ang tama
pagbabago ang adhika, bayan ay mapalaya
mula sa kuko ng mapagsamantala’t kuhila
hanggang ngayon, ang hinahanap na hustisya’y wala

“Presente” para sa lahat ng desaparesidos
ito rin ang sigaw kong nakikibaka ng lubos
sigaw rin ng ibang ang pakikibaka’y di tapos
na sa masa’y patuloy pang naglilingkod ng taos

tuloy ang paghahanap sa katawan at hustisya
ng mga nagmamahal at naulilang pamilya
hiling na kahit katawan sana’y matagpuan na
“Presente”, hustisyang asam nawa’y kamtin na nila

– gregbituinjr.
04.11.2020

Submit your contribution online through HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Right-Up] Ang karapatan natin sa sapat na pagkain -ni Greg Bituin Jr.

Maikling saliksik at sanaysay ni Greg Bituin Jr.

Sinasabi nilang dalawa lang umano ang dahilan o sitwasyon kung bakit ka pakakainin ng gobyerno – sa panahon ng digmaan at sa panahon ng kalamidad. Kung wala ang mga ito, kumilos ka o magtrabaho upang makakain. Ang panahon ngayon ay pumapatak sa dalawa – digmaan laban sa COVID-19, at kalamidad dahil hindi na makapagtrabaho ang tao dahil sa ipinatutupad na community quarantine, kung saan pinapayuhan ang mga tao, upang hindi mahawa ng sakit, na huwag lumabas ng bahay.

Ang karapatan sa pagkain ang isa sa limang karapatang nakasaad sa International Covenant on Economic, Social and Cultural Rights o ICESCR. Ang apat na iba pa ay ang pabahay, kalusugan, trabaho, at edukasyon. Ang karapatang ito’y nakasulat din sa dokumentong The Right to Adequate Food, OHCHR Fact Sheet No. 34, OHCHR/FAO (2010). Ang OHCHR ay Office of the High Commissioner on Human Rights ng United Nations.

Sa General Comment No. 12 ng UN Committe on Economic, Social and Cultural Rights (CESCR), nagbigay sila ng detalyadong patnubay sa mga bansa hinggil sa kanilang obligasyong igalang, protektahan at tuparin ang karapatang magkaroon ng sapat na pagkain. Nabanggit din ng Komite na kasama ang karapatan sa mga sumusunod na magkakaugnay at mahahalagang salik o elemento ng karapatan sa sapat na pagkain: Availability, Accessibility, Adequacy, at Sustainability.

AVAILABILITY o pagkakaroon ng agarang suplay ng pagkain. Ang bawat tao’y dapat makakuha ng sapat at dekalidad na pagkain, na maaaring mula sa palengke o direkta mula sa tanim, alagang hayop o sa dagat, at iba pang likas na yaman. Pagkaing nakapagpapalusog, at dapat walang nakakapinsalang sangkap at naaangkop sa kultura.

ACCESSIBILITY o madaling makuhang pagkain. Dapat ang pagkakaroon ng sapat na pagkain, ay walang diskriminasyon, na ang pagkain ng mayaman ay kaya ring kainin ng mahihirap. At ang presyo ng pagkain ay abotkaya ng mga bulnerableng sektor ng ating lipunan.

ADEQUACY o pagiging sapat ng pagkain. Dapat hindi kulang, at sapat ang pagkain kung saan kayang kumain ng tao, kahit na dukha, ng tatlong beses sa isang araw, at busog sila.

SUSTAINABILITY o tuloy-tuloy na paglikha ng pagkain. Dahil ang mga tao’y kumakain araw-araw, dapat na patuloy din ang paglika ng pagkain. Dapat nating pasalamatan ang lahat ng magsasaka dahil kung wala sila, wala tayong kakainin araw-araw.

Sabi nga, di natin kailangan ng abugado o doktor araw-araw, ngunit kailangan natin ng magsasaka araw-araw. Kaya salamat sa lahat ng magsasaka, mangingisda, magtutubo, magninyog, at mga manggagawang patuloy na lumilikha ng pagkain. Mabuhay kayo!

Pinaghalawan:
https://www.escr-net.org/rights/food
https://www.ohchr.org/EN/Issues/ESCR/Pages/Food.aspx

* Ang maikling artikulong ito’y inihanda at unang nilathala sa pahayagang Taliba ng Maralita, ang opisyal na publikasyon ng Kongreso ng Pagkakaisa ng Maralitang Lungsod (KPML), isyu ng Abril 1-15, 2020, pahina 2

Submit your contribution online through HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Anila, “Stay at home” -ni Greg Bituin Jr.

panawagan ngayong / lockdown, “Stay at home.”
basta may pagkain / upang di magutom
sundin lamang ito / sa panahong lockdown
dapat kung mayroon / tayong malalamon.

“Stay at home” ngayong / naka-kwarantina
subalit pamilya’y / may makakain ba?
dapat tiyaking may / pagkain sa mesa
nang di magkasakit / ang buong pamilya.

mayroon ba kayong / pambili ng bigas?
tigil sa trabaho, / paano na bukas?
paano rin naman / kung walang lalabas?
sinong magbibigay / ng ulam at prutas?

“Stay at home” muna / kahit walang pera
“Stay at home” ka lang, / bukas, bahala na…
tutulong ba sila / pag nagkasakit ka?
o pag nagka-virus, / magagamot ka ba?

– gregbituinjr.

Submit your contribution online through HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Nais kong magboluntaryo laban sa COVID-19 -ni Greg Bituin Jr.

nais kong magboluntaryo laban sa COVID-19
ayokong sa bahay lang, itlog ay palalakihin
subalit di ako doktor, nars, o health worker man din
nais ko lang tumulong, anumang kaya’y gagawin

kumbaga, ayokong nasa gera’y walang magawa
habang tigil sa trabaho ang kapwa manggagawa
sa nangyayaring ito’y dapat lang bang tumunganga?
maghintay lang kung kailan kwarantina’y mawala?

ayokong manood lang ng ulat tungkol sa sakit
pulos istatistika, ilan na ba ang maysakit
nakatunganga akong baka mahawa ng sakit
magboluntaryo sana’t mag-ambag kahit maliit

ang COVID-19 na’y talagang tunay na digmaan
paano maliligtas ang bansa’t sangkatauhan
maraming frontliner na’y nawala’t nalalagasan
ako’y nakatunganga’t di makatulong sa bayan

ginagawa’y kwento’t tulang di naman makakain
kaya gutom ang pamilya’t di sila mapakain
kaya nais kong magboluntaryo’y magkasilbi rin
sa sitwasyong di nakikita ang kakalabanin

ako’y tibak na hinanda ang sarili sa digma
ako’y makatang sa nangyayari’y makakatula
isusulat ko ang mga nakikitang masama
handa ang bisig sa sitwasyong nakakatulala

kung kailangan ng boluntaryo, sabihan ako
nasa probinsya man, malayo sa Maynilang sentro
nais magsilbi’t magkasilbi sa sitwasyong ito
at mapanatili ang sanidad, di nababato

– gregbituinjr.

HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Right-Up] Atake sa Senado – Ni Greg Bituin Jr.

SINA KA EDDIE GUAZON AT FR. PETE MONTALLANA
Maikling sanaysay ni Gregorio V. Bituin Jr.

Kapwa kilalang lider sila ng kani-kanilang panahon. Kapwa sila may kaugnayan sa maralita. Pareho silang prinsipyado, determinado, palaban, kagalang-galang, magiting. Subalit pareho rin silang inatake habang nagsesesyon sa Senado habang ipinaglalaban ang mga maliliit at api sa lipunan. Ang isa’y tuluyang namatay at ang isa’y pinalad na nabuhay.

Si Ka Eddie Guazon ang unang pangulo ng Kongreso ng Pagkakaisa ng Maralitang Lungsod (KPML) na naitayo tatlo’t kalahating dekada na ang nakararaan. Namatay siya habang nasa pagdinig ng Senado kaugnay sa mga nagaganap na demolisyon. Doon sa Senado ay inatake siya ng cardiac arrest habang pinabubulaanan ang testimonya ng isang pulis. Dinala siya sa Philippine General Hospital subalit hindi na siya umabot ng buhay.

Si Fr. Pete Montallana ay aktibo sa Save Sierra Madre Network Alliance, Inc. (SSMNAI) at sa Stop Kaliwa Dam (SKD) campaign. Nitong nakaraan lang, nabalitaan kong dinala siya sa ospital habang nasa pagdinig sa Senado kaugnay sa proyektong Kaliwa Dam na mahigpit din niyang tinututulan. Dinala siya sa klinik at sa kalaunan ay sa ospital, at siya’y inoperahan. Sa ngayon, siya’y nagpapagaling.

Hindi ko na naabutan pang buhay si Ka Eddie Guazon pagkat 1989 siya namatay. Subalit inipon ko ang mga kasaysayan ng KPML na inilagay ko sa blog na aking binuo. Pati ang kanyang mga larawang nalathala sa isang magasin ng pagpupugay sa kanya at ang nag-iisang kwadro ng kanyang litratong nasa tanggapan ng KPML ay aking nilitratuhan upang mailagay sa blog. Kaya pag kailangan ng kasaysayan ng KPML, datos, pahayag, sa blog ng KPML ito makikita. Ako naman ay napunta sa KPML bilang staff noong 2001 hanggang Mayo 2008. At muling nagbalik sa KPML bilang halal na sekretaryo heneral nito noong muling maglunsad ito ng kanyang pambansang kongreso noong Setyembre 16, 2018.

Click the link below to read more:

Submit your contribution online through HRonlinePH@gmail.com
Include your full name, e-mail address and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc.

[Tula] Ang kuyog bilang pilosopiya ng katarungan – ni Greg Bituin Jr.

marami nang balitang kinuyog ng mamamayan
ang mga salaring may ginawang krimen sa bayan
sadyang kinuyog siya ng galit na taumbayan
na nagtulong-tulong upang krimen ay mapigilan

pakiramdam ng taumbayan, sila ang biktima
sila ang hinoldap, ginahasa, at pinuntirya
di ito hahayaang mangyari pa sa kanila
taumbayan na ang sa kriminal ay nagsentensya

maraming tao ang nagtulong-tulong kaya kuyog
tulad nito ang bayanihan ng mga bubuyog
napakarami, sama-sama, mundo’y inaalog
animo’y bulkan silang sama-sama sa pagsabog

anyo ng hustisyang pinakita ng Pilipino
nagkakaisang pagkilos laban sa tarantado
di man magkakakilala’y pipigilan ang gago
upang mapiit dahil sa sala sa kapwa tao

kuyog na’y isang pilosopiya ng katarungan
naiibang hustisyang marahil taal sa bayan
tulong-tulong sila pagkat di nila hahayaan
na ang kriminal ay pagala-gala sa lansangan

– gregbituinjr.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Hindi krimen ang aktibismo -ni Greg Bituin Jr.

aktibista’y katulad ng mga Katipunero
sila’y may simulain at niyakap na prinsipyo
itinataguyod ang pakikipagkapwa-tao,
katarungan at pagkakapantay-pantay sa mundo

isang lipunang makatao ang pangarap nila
isang lipunang walang ganid na kapitalista
lipunang umiiral ang panlipunang hustisya
lipunang walang pang-aapi’t pagsasamantala

aktibista’y kumikilos para sa karapatan
ng tao at para sa katarungang panlipunan
nais nilang mawala na ang tiwali’t gahaman
upang magkaroon ng ginhawa’t kapanatagan

kinakalaban ng aktibista ang mga sakim
sa kapangyarihan at nagdudulot ng panimdim
kinakalaban nila ang diktadurang malagim
na ang puso’t isipan ng namumuno’y madilim

kaya di krimen ang may prinsipyo’t ang aktibismo!
ang kriminal ay yaong mga negosyanteng tuso
na nanghuhuthot sa lakas-paggawa ng obrero
at palakad sa pamahalaan ay tiraniko

sa gobyerno’y kriminal ang pinunong tuso’t tunggak
na sa elitistang naghahari pumapalakpak
kriminal ang pinunong pagpaslang ang nasa utak
kaya dapat lang ang mga tulad nila’y ibagsak!

– gregbituinjr.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Itinirik nila’y halaman imbes na kandila -ni Greg Bituin Jr.

itinirik nila’y halaman imbes na kandila
katabi ng larawan ng mahal nilang winala
halaman upang tumubo, pag-asa ang sagisag
simbolong bawat isang naroo’y maging matatag

uusbong ang halaman upang maging isang puno
na magbibigay ng lilim sa bawat nahahapo
magbibigay ng bunga sa bawat gutom at luha
at tutulong upang mapawi ang malaking baha

mga halamang simbolo ng desaparesido
upang mahal na winala’y matagpuang totoo
daraan ang araw, buwan, taon, puno’y yayabong
magkakabunga’t panibagong pag-asa’y uusbong

itinanim na halaman ay ating alagaan
diligan palagi’t huwag hayaang matuyuan
nawa ibunga nito’y kapayapaan sa puso
at mabubuong pag-asa’y patuloy pang lumago

– gregbituinjr.
* Larawan kuha ng may-akda sa aktibidad ng FIND sa Bantayog ng mga Desaparesido, Nobyembre 2, 2019

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Hustisya sa mga desaparesidos -ni Greg Bituin Jr.

wala kaming puntod na titirikan ng kandila
hanggang ngayon, sa mahal namin ay nangungulila
sila’y aktibistang nagsikilos upang lumaya
mula sa pagsasamantala ang bayan at dukha

inorganisa ang kababaihan, manggagawa
magsasaka, kabataang estudyante, ang madla
ang guro, manininda, abugado, mangingisda
subalit sila’y dinukot, sinaktan, iwinala

hinanap ng pamilya ang kanilang katauhan
nagtungo sa mga ospital, presinto, kulungan
nagbabakasakaling may bakas silang naiwan
sinong saksi, sinong maysala o may kagagawan

sa paghahanap sa kanila’y di dapat mabagot
sa nangyaring pagkawala, sinong dapat managot
krimen at pangyayaring ganito’ y dapat malagot
mga naiwang katanungan ay dapat masagot

hustisya’y aming sigaw, sa kampo, korte, kalsada
saanmang lugar, panawagan namin ay hustisya
mga desaparesidos sana’y matagpuan na
mga mahal naming iwinala, sana’y makita

– gregbituinjr.
* Inihanda para sa paggunita ng grupong FIND (Families of Victims of Involuntary Disappearace) sa kanilang mga mahal na desaparesidos sa Nobyembre 2, 2019, mula 9am-12nn, sa Baclaran Church.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Tula] Ngayong Undas, gunitain ang mga biktima ng EJK -ni Greg Bituin Jr.

Ngayong Undas, alalahanin ang mga pinaslang
lalo ang mga inosenteng pinatay ng halang
kayraming biktimang itinumba sa murang gulang
hustisya ang hiyaw ng kamag-anak at magulang

bakit sila pinaslang nang wala man lang proseso
wala man lang paglilitis kung may sala nga ito
ganyan ba magpahalaga ang gobyerno sa tao
pinairal nila’y mga polisiyang barbaro

may tinatawag silang restoratibong hustisya
o restorative justice, may pagbabago pa sila
kung may sala, ikulong at bunuin ang sentensya
kung walang sala, huwag paslangin, mag-imbestiga

di wasto ang pamamaslang, ikulong pag maysala
huwag maging berdugo lalo sa harap ng dukha
huwag sumunod sa utos ng buwang na kuhila
huwag malasing sa dugo’t pawis ng iyong kapwa

sana’y igalang na ang proseso’t maging parehas
sana’y maging patas sila sa ilalim ng batas
ngayong Undas, gunitain ang buhay na nalagas
at magtirik ng kandila sa puntod ng inutas

– gregbituinjr.
Follow Greg Bituin Jr. @
Blogsite: http://matangapoy.blogspot.com/
Facebook: https://web.facebook.com/akdatulanigregbituinjr/

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.

[Right-Up] BATANG BILANGGO, EDAD SIYAM? -ni Greg Bituin Jr.

BATANG BILANGGO, EDAD SIYAM?

tama bang sa edad siyam, ang bata na’y mapiit?
hustisya na ba sa bansa’y ganito na kalupit?
sa murang gulang, karapatan niya’y pinagkait
kinulong dahil sindikato sa kanya’y gumamit

batang edad siyam ay dapat na raw maikulong
panukalang ito sa Kongreso’y isinusulong
pag bata’y gumawa ng krimen at agad sinuplong
kulong agad habang laya ang nag-atas na buhong!

ano nang nangyari sa ating mga mambabatas?
krimen ba’y di na kaya ng kapulisang malutas?
di na mapigil ng maykapangyarihan ang dahas?
mga sakit ba ng lipunan ay wala nang lunas?

mga magulang ba ng batang bilanggo’y pabaya?
bakit magulang ay kayod ng kayod ngunit dukha?
mga bata ba’y inabandona na’t isinumpa?
o problema’y ang sistemang nagdulot ng dalita?

bakit nais makulong ang bata, ano ang sanhi?
halina’t pag-isipan, patuloy tayong magsuri
dulot kaya ito ng pagkakaiba sa uri?
o baka mambabatas ay hungkag ang mga budhi?

– gregbituinjr.

Follow Greg sa Fb (Mga tula’t akda ni Gregorio V. Bituin Jr.)

Submit your contribution online through HRonlinePH@gmail.com
Include your full name, e-mail address and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc.

[Tula] Isa-isa nilang inuubos ang maralita -ni Greg Bituin

Isa-isa nilang inuubos ang maralita
Tila baga masakit sa mata ang mga dukha
Itinitimbuwang na lang ang mga walang-wala
Gipit na nga’y ginigipit, dukha’y isinusumpa
Iniisip bang krimen at droga’y di na lumala?

Laksa ang pinaslang, kayraming nasayang na buhay
Ang karapatang mabuhay ay hinayaang tunay
Naglipana sa komunidad ang maraming bangkay
Gamit ang kapangyarihan, dukha’y pinagbibistay
Pinurga ang dalita’t pinasok sa bahay-bahay

Adik sa droga’y parang kuto lang na tinitiris
Mga tao’y naligo sa sariling dugo’t pawis
Adik sa pagpatay na dulot ay lumbay at hapis
Mga taong tingin sa krimen ay dapat mawalis
Aktibong durugin ang mga naglipanang ipis

Sa mga nangyari, hustisya’y sigaw ng pamilya
Labag sa karapatan pagkat buhay ang kinuha
Ang paglilitis, tamang proseso’y balewala ba?
Na asam na katarungan kaya’y makakamtan pa?
Gumising ka, bayan, pigilan na ang pagdurusa!

– gregbituinjr.

Follow Greg Bituin Jr. @
Blogsite: http://matangapoy.blogspot.com/
Facebook: https://web.facebook.com/akdatulanigregbituinjr/

Submit your contribution online through HRonlinePH@gmail.com
Include your full name, e-mail address and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc.

[Tula] Turok ni Kamatayan -ni Greg Bituin

Turok ni Kamatayan

ang Dengvaxia’y pumaslang ng limampu’t pitong tao
ayon sa ulat na inilathala sa diyaryo
ang limampu’t apat dito’y bata, isang obrero,
isang pulis, isang doktor, aba’y kaytindi nito!

ayon sa pagsusuri, sumakit ang ulo’t tiyan
nilagnat, nagsuka, namaga ang internal organ
na nangamatay matapos nilang mabakunahan
aba’y nasayang ang buhay lalo ng kabataan

Turok ni Kamatayan, turing ngayon sa Dengvaxia
tila isinumpa ang kontrobersyal na bakuna
na kamatayan pala’y dala sa mga pamilya
sino na ang mananagot sa pagkawala nila?

mapaparusahan ba’y yaong nagturok na duktor
o ang dambuhalang kumpanyang Sanofi Pasteur
panlaban sa dengue na ito’y sila ang promotor
ika ng matatanda, nangyaring ito’y “que horror!”

mayorya’y batang may kinabukasan at pangarap
na nabiktima’t nadale ng mga mapagpanggap
kumpanya’y mayaman, mga biktima’y mahihirap
gobyerno ba’y malalagot, sa kanila’y lilingap?

laban sa dengue, dukha’y sa patalim nagsikapit
inakalang ang bata’y maging malusog sa pilit
hustisya sa lahat ng namatay ang aming hirit!
katarungan sa mga biktima’y dapat makamit!

– gregbituinjr.
– ang tula’y ibinatay sa balita sa pahayagang Bulgar, Mayo 28, 2018, na may pamagat ding “Turok ni Kamatayan”

Follow Greg Bituin Jr. @
Blogsite: http://matangapoy.blogspot.com/
Facebook: https://web.facebook.com/akdatulanigregbituinjr/

Submit your contribution online through HRonlinePH@gmail.com
Include your full name, e-mail address and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc.

[Right-up] Bakit ba salbahe ang ‘Salvage’ -ni Greg Bituin Jr.

image by Design Egg Yolk

Bakit ba salbahe ang ‘Salvage’

salitang ‘salvage’ ay di Ingles sa ‘save’ o pagsagip
ito’y Kastilang ‘salbaje’ at salbahe ang hagip
kayraming mga na-salvage, pinagkamalan, suspek
makikita na lang, bulagta’t buhay na’y tiwarik

uso pa kasi ang bato, bato-bato sa langit
“Ding, ang bato”, sabi lagi ni Darnang anong rikit
kaya mga nagbabato’y talaga ngang tagilid
mapapaagang sa kabaong sila’y maisilid

gayunman, isaalang-alang ang due process of law
pagkat ang bawat isa’y may karapatang pantao
kahit negosyanteng drug lord na siyang puno’t dulo
kung bakit nagkalat ang drogang kanilang negosyo

naglipana ang ‘na-salvage’, kayraming sinalbahe
ngunit maliliit, pawang dukha ang nadadale
di batid kung ilan ang sinalbaheng inosente
nahan ang mga drug lord, ang mga may sinasabi

nawa’y masugpo ang mga droga, shabu’t ecstasy
at dapat mapigil nang di kumalat sa marami
ngunit ang tamang proseso’y pairaling maigi
habang binubunot ang mga ugat na kaytindi

– gregbituinjr.

Follow Greg Bituin Jr. @
Blogsite: http://matangapoy.blogspot.com/
Facebook: https://web.facebook.com/akdatulanigregbituinjr/

Submit your contribution online through HRonlinePH@gmail.com
Include your full name, e-mail address and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc.

[Right-up] Sa mga naglalaway sa dugo ng kapwa – ni Gorio Bituin

Photo from Jenny’s FB

Sa mga naglalaway sa dugo ng kapwa
ni Gorio Bituin

akala nila, makatarungan ang pamamaslang
magiging kriminal naman daw ang sugapang halang
at makakatulog ng mahimbing ang mamamayan
pag wala nang sugapang banta sa kinabukasan

akala nila, bayani sila pag pumapatay
tamang proseso ng batas ay balewalang tunay
“bayani” silang sa dugo ng kapwa’y naglalaway
kapayapaan daw ng bayan ang kanilang alay

akala nila, krimen ay agad nilang napigil
kahit wala pang nagagawa ang sugapang sutil
wala pang krimen, dukha’y tututukan na ng baril
sira na raw ang utak kaya agad kinikitil

akala nila, dapat walang kara-karapatan
dahil daw ang karapatan ay sagabal sa bayan
akala nila, pagpaslang ay tungong kaunlaran
payapa ang negosyo, buhay man ay paglaruan

sino silang basta kukuha ng buhay ng tao?
sino silang naglalaway sa dugo ng kapwa mo?
budhi ba nila’y payapa’t bayani ngang totoo?
para sa bayan nga ba ang pagpaslang ng berdugo?

ang ginagawa nila’y karumal-dumal ding krimen
bayani sa sarili, ngunit sa madla’y salarin
mananagot sila, budhi nila’y mang-uusig din
kriminal din pala sila’y di nila akalain

– gregbituinjr.

Follow Greg Bituin @
Blogsite: http://matangapoy.blogspot.com/
Facebook: https://web.facebook.com/goriobituin

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc

 

[Right-up] Sa mga manggagawa ng minahan -ni Greg Bituin Jr.

Photo from Gorio Bituin FB

Sa mga manggagawa ng minahan
ni Greg Bituin Jr.

marami na kayong nagtatrabahong manggagawa
minimina ang bundok, ginagalugad ang lupa
upang matagpuan ang mineral na pinagpala
kahit ang kalupaa’y patuloy na lumuluha

pikitmata sa nangyayari dahil sa trabaho
walang pakialam sa kinabukasan ng tao
gumuho man ang bundok, para sa kapitalismo
mabutas man ang lupa, para sa tubo at sweldo

bakit kayo’y manggagawang tila walang magawa
upang kalikasan ay di na tuluyang masira
kasi pag walang trabaho, pamilya nyo’y kawawa
mina ng mina, kalikasan ma’y mapariwara

mga manggagawa kayong dapat organisahin
alang-alang sa pamilya at kalikasan natin
at para sa kinabukasan ng lahing magiting
makiisa na kayo sa pakikibaka namin

lupa’t tao’y wasak dahil sa asam nilang tubo
kalikasa’y labis-labis na ang damang siphayo
huwag nang sirain ang bundok at lupang ninuno
pagmina’y itigil sa panig na ito ng mundo

magkaisa lahat ng manggagawa sa minahan
pamilya’t kalikasa’y sabay nating alagaan
halina’t itindig ang makakalikasang bayan
at sabay na itayo ang makataong lipunan

– gregbituinjr.

Follow Greg Bituin @
Blogsite: http://matangapoy.blogspot.com/
Facebook: https://web.facebook.com/goriobituin

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc

[Right-up] Kumunoy na Lupa -ni Greg Bituin Jr.

Kumunoy na Lupa
ni Greg Bituin Jr.

nakapaglalakad pa noon sa lupang kinagisnan
ngunit ngayon, isa na iyong malagim na putikan
winasak, binaboy ng mga suwitik na minahan
ang kabukiran ay nagmistula nang isang libingan

nawasak ang lupa, dahil sa lintik na pagmimina
nawasak ang bukas, dahil sa lintik na pagmimina
nasira na ang kalikasan, dahil sa pagmimina
nasira na ang kabukiran, dahil sa pagmimina

kumunoy na ang lupang dating masayang tinatahak
kumunoy na ang lupa’t nagmistula na itong lusak
sa kalansing ng ginto, minahan ay nagsihalakhak
walang pakialam kung buhay at lupa na’y mawasak

bago mahuli ang lahat, lumubog ang buong bayan
tutulan na at labanan ang ganitong kahayukan
ibaon na ang mga kapitalista ng minahan
doon sa kumunoy na lupang kanilang kagagawan

Follow Greg Bituin Jr. @
Blogsite: http://matangapoy.blogspot.com/
Facebook: https://web.facebook.com/goriobituin

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc

[Right-up] Ang pagpepedikab man ay marangal na hanapbuhay -ni Greg Bituin

Ang pagpepedikab man ay
marangal na hanapbuhay

mumo lang kung tutuusin ang kinikita nila
sa paghatid ng pasahero, tanggap nila’y barya
sariling kayod upang makakain ang pamilya
ngayon, kabuhayan nila’y napagdiskitahan pa

ang pagpepedikab ay marangal na hanapbuhay
sa tatlong gulong man, may ngiti silang nasisilay
araw-gabi’y nagsisikap na magtrabahong tunay
ngayon, bakit kabuhayan nila ang niluluray

kung yaong bakal na ibon ay malaking negosyo
natatanggap lang ng mga pipit ay pawang mumo
di naman sila mayang paaapi sa kung sino
o baka maging langay-langayan ang mga ito

may karapatang mabuhay ang mga maralita
hayaan silang marangal na magtrabahong kusa
kahit tatlong gulong ay may hatid na ngiti’t tuwa
pagkat marangal ang ginagawa nila sa madla

– gregbituinjr.

Follow Greg Bituin @
Blogsite: http://matangapoy.blogspot.com/
Facebook: https://web.facebook.com/goriobituin

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos etc