Tag Archives: Modules

[Statement] Natapos ang third quarter nang walang dumating na printed modules | TDC

#HumanRights #Teachers #COVID19Ph

Natapos ang third quarter nang walang dumating na printed modules

Ngayong araw magtatapos ang Third Quarter para sa School Year 2020-2021 at magsisimula ang Fourth Quarter sa Lunes, Mayo 17, 2021.

Kung tutuusin ay halos patapos na ang kasalukuyang school year at papasok na uli tayo sa susunod na taong-pampaaralan, ang SY 2021-2022 na maagap na itinakda ng DepEd sa Agosto 23, 2021. Inaasahang distance learning muli ang sistema ng susunod na school year dahil na rin sa sitwasyon ng COVID sa ating bansa. At habang lubos ang suporta ng mga guro sa edukasyon sa ilalim ng pandemya, hindi naman maaaring pikitan natin ang mga pagkukulang ng Kagawaran ng Edukasyon (DepEd) upang maihatid ang ipinangakong serbisyo para sa ating mga mag-aaral at mamamayan. Ang mga pagkukulang kasi na ito, bandang huli ay mga guro ang siyang magpupuno at mahihirapan.

Tama, natapos na ang third quarter pero hanggang ngayon ay marami pang mga paaralan sa halos lahat ng mga dibisyon- probinsiya at lungsod sa bansa ang wala pa ring printed modules. Kung mayroon man ay kulang na kulang ito o kaya’y soft copy lamang na ida-download ng mga guro ang ibinigay sa kanila.

Read more

[Press Release] Mga Guro, muling nanawagan na itigil na ang produksiyon ng modules -TDC

#HumanRights #Education Mga Guro, muling nanawagan na itigil na ang produksiyon ng modules

Benjo Basas, National Chairperson, Teachers Dignity Coalition (TDC). File Photo by Arnel Tuazon

Dalawang linggo matapos ang pagbubukas ng klase noong Oktubre 5, muling nanawagan ang Teachers’ Dignity Coalition (TDC) sa Department of Education (DepEd) na ipatigil na ang pag-iimprenta ng modules na ginagamit ngayon sa mga pampublikong paaralan.

“Sapat na ang dalawang linggo para makita natin at mapatunayan na hindi talaga uubra ang modules na ito. Napakalaki na ng ginugugol na halaga para dito ngunit hanggang ngayon ay hindi pa rin ito sapat. Maliban pa sa nakita nating problema sa kung paano ito isasagawa ng ating mga mag-aaral at kanilang mga magulang. Sana naman ay ikonsidera na ng DepEd ang agarang pagpapatigil sa produksiyon nito upang maisalba rin ang malaking halagang maaaring masayang mula sa buwis ng taumbayan,” pahayag ni Benjo Basas, national chairperson ng TDC.

Ayon pa kay Basas, maliban sa maraming nakitang mga pagkakamali sa learning modules ay hindi pa maayos ang pagkakaimprenta ng marami dito sapagkat nagkanya-kanya ang mga paaralan sa pag-iimprenta. Matatandaang noon pang kalagitnaan ng Setyembre ay nanawagan na ang grupo na huwag nang gumamit ng modules dahil sa malaking gastos dito at sa halip ay gumamit na lamang ng mga aklat na mas matibay at mas matipid.

Sinabi rin ng grupo na ito ay isang patunay lamang na hindi talaga nakahanda ang ahenisya taliwas sa paulit-ulit nitong mga pahayag.

“Sabi ng DepEd ay handang-handa na sila sa pasukan at itinuring pang tagumpay ang pagbubukas ng klase. Pero bakit ganito ang nangyari? Bakit hindi pa nakahanda ang modules na bandang huli ay DepEd Central Office din mismo ang nagsabi na nahihirapang makaagapay ang mga mag-aaral. Sa lahat ng pagkukulang na ito ng DepEd, mga guro ang nagdusa, mula pag-aabono sa modules, reklamo ng mga magulang at sobrang bigat na mga gawain,” dagdag pa ni Basas.

Ayon pa sa TDC, dapat umanong agarang gumawa ng pahayag at polisiya ang DepEd na iniuurong na ang paggagawa ng modules alinsunod na rin sa mga naunang pahayag ni Sec. Leonor Briones.

“Si Sec. Briones na mismo ang nagsabi na magastos at may malaking implikasyon sa kapaligiran ang paggamit ng modules, baka raw maubos ang mga puno natin dahil sa malaking pangangailangan sa papel. Yun naman pala eh, bakit kailangan pang ipilit nang ipilit ito?” Tanong ni Basas.

Ang panawagan sa paggamit ng mga aklat sa halip na modules ay pormal na ring naisumite ng TDC sa dalawang kapulungan ng Kongreso maging sa Malacanang bago pa man magbukas ang klase noong Oktubre 5.#

Para sa mga detalye:
Benjo Basas, National Chairperson
09273356375/ 09230819750

Submit your contribution online through HRonlinePH@gmail.com
Include your full name, e-mail address, and contact number.

All submissions are republished and redistributed in the same way that it was originally published online and sent to us. We may edit submission in a way that does not alter or change the original material.

Human Rights Online Philippines does not hold copyright over these materials. Author/s and original source/s of information are retained including the URL contained within the tagline and byline of the articles, news information, photos, etc.